فى مرة مسكوا واحده متلبسه فى حالة زنى وماتعرفش راح فين الشخص اللى كان معاها. ماحدش جاب سيرة عنه . يمكن صعب عليهم فسابوه كعادة الشرقيين .
المهم مسكوا الست دى وخادوها للمسيح وقالوا له موسى قالنا اللى زى دى لازم تترجم ,انت رأيك ايه ؟ الموضوع كله كان عايزين يوقعوه فى الغلط علشان يشتكوه بعد كده.
وكان الرد الحاسم واللى انا شايفه سبب من اهم اسباب التخلف والهمجية والغوغائية اللى احنا عايشين فيها وواحد من اهم اسباب الرقى واحترام الخصوصية وعدم التطفل على الاخرين عند الدول المحترمة التى تقدر وتحترم الحريات .
قالهم من كان منكم بلا خطية فليرمها اولا بحجر  . ويسكت ؟؟!!! لا . مسك عصاية وقعد يكتبلهم بيها على الارض خطية كل واحد فيهم . واحد واحد وكل اللى يشوف اللى يخصه ياخد ديله فى سنانه ويهرب لحد ما كلهم هربوا.
رفع المسيح عينه من عالارض وسأل الست , هو فين الرجالة اللى كانوا جايبينك . هو مافيش حد أدانك ؟!
قالت له : لا يا سيدى . قالها ولا انا ايضا ادينك . اذهبى ولا تخطئى أيضا.
حراس الفضيلة اللى عايشين دور الشرف خليك فاكر ان الفرق بينك وبين اللى بتنهش فى لحمه علشان غلط هو الستر. فاحمد ربنا على نعمة الستر لان لو ربنا فضحك وكشف خطيتك قدام الناس يمكن الناس تقرف تتف فى وشك .
فوحياة ابوك بلاش ترسم دور الشرف على غيرك وخليك فى حالك .